Pas tërmetit të fuqishëm që preku vendin tonë, Shqipëria, por jo vetëm është ngritur në këmbë për të ndihmuar të prekurit. Pranë Teatrit Kombëtar, prej dy ditësh po mblidhen ndihma për tu dërguar më pas në zonat që kanë nevojë. Aleanca për Mbrojtjen e Teatrit ka publikuar fotot ku shfaqen çifti Roza e Dhimitër Anagnosti që kanë shkuar pranë Teatrit për të dorëzuar ndihmat e tyre.
Statusi i Aleancë për Mbrojtjen e Teatrit
Roza dhe Dhimitër Anagnosti solidarizohen me të prekurit nga tragjedia e tërmetit. Ata sapo erdhën në mjediset e Teatrit Kombëtar për të dorëzuar ndihmat te Aleanca për Mbrojtjen e Teatrit.
Të angazhuar dhe shembull qytetarie, ata e shumë artistë të tjerë të angazhuar me qëndresën e Teatrit janë pranë qytetarëve në këto ditë të vështira kur luftohet me forca që nuk kontrollohen dot, me vdekjen, rrënimin e jetës, frikën nga sa vjen.